ABŞ İsrailə İranın hərəkətlərinə cavab vermək üçün birgə hərbi planların hazırlanması ilə bağlı təşəşəbbüs irəli sürüb.

“Bu barədə “Axios” Amerika və İsrail hakimiyyət orqanlarındakı mənbəyə istinadən məlumat yayıb.

“ABŞ Prezidenti Co Baydenin administrasiyası İsraili bir neçə həftə əvvəl İran üçün birgə hərbi planlaşdırma ideyası ilə tanış edib”, - portal yazır.

Amerika tərəfi vurğulayıb ki, bu, ABŞ və İsrail arasında hərbi əməkdaşlığın əhəmiyyətli inkişafına səbəb olacaq görünməmiş təklifdir. Bu fikirlər ABŞ Silahlı Qüvvələrinin Birləşmiş Qərargah Rəisləri Komitəsinin sədri, general Mark Milley və ABŞ Mərkəzi Komandanlığının rəhbəri general Maykl Kurillanın İsrailə son səfərləri zamanı İsrail tərəfinin diqqətinə çatdırılıb.

Nəşrin yazdığına görə, İsrail hakimiyyəti isə ABŞ-nin təşəbbüsünə şübhə ilə yanaşır.

İsrail hesab edirdi ki, Vaşinqton İsraili İrana qarşı, xüsusən də onun nüvə proqramına qarşı hərəkət etmək imkanından məhrum etməyə çalışır.

Nəticədə İsrail Vaşinqtonun planını rədd etməyib, aydınlıq gətirilməsini istəyib.

İsrailin Ağ Evin bu təşəbbüsünə olan şübhəli yanaşmasına Amerika rəsmisi “Axios”a açıqlamasında deyib ki, Amerika təşəbbüsü İsraili fəaliyyət azadlığından məhrum etmək deyil, onu dəstəkləmək məqsədi daşıyır.

Portal qeyd edir ki, iki həftə əvvəl ABŞ-nin milli təhlükəsizlik müşaviri Ceyk Sallivan Vaşinqtonun Yaxın Şərq Siyasəti İnstitutunda çıxışı zamanı İsraili narahatlığa əsas olmadığına inandırmağa çalışıb.

“Biz açıq şəkildə bildirdik ki, İrana heç vaxt nüvə silahına sahib olmağa icazə verilməyəcək. ABŞ Prezidenti Co Baydenin dəfələrlə dediyi kimi, bu məqsədə çatmaq üçün lazımi tədbirləri görəcək”, - Sullivan bildirib.