"Son Zəng"yeni həyata atılan ilk addım ... [xfgiven_qirmizi] [/xfgiven_qirmizi]
Bu gün 13 iyun 2026 cı il tarixində Sabirabad rayonu Yolçubəyli kənd tam orta ümumi təhsil məktəbində "Son Zəng" tədbiri keçirildi. Tədbirdə dəvət olunmuş qonaqlar, məktəb kollektivi, valideynlər və şagirdlər iştirak etdilər.
Tədbir zamanı məktəbin direktoru Kənan Ələsgərov 2025–2026-cı tədris ili ərzində təhsildə, ictimai fəaliyyətlərdə və məktəbdaxili tədbirlərdə fəal olan şagirdlərə, həmçinin buraxılış imtahanlarında yüksək nəticələr göstərən məzunlara diplomlar təqdim etdi.
Bu əlamətdar gündə məktəbin 1-ci sinif şagirdləri ilk təhsil pilləsini uğurla başa vurmağın sevincini yaşadılar. 4-cü sinif şagirdləri isə ibtidai təhsil mərhələsini tamamlayaraq növbəti təhsil pilləsinə qədəm qoymağın qürurunu hiss etdilər.
Tədbirdə kənd ağsaqqalları, uzunillik pedaqoji fəaliyyətə malik təcrübəli müəllimlər, valideynlər və qonaqlar çıxış edərək məzunlara və şagirdlərə gələcək həyat yollarında uğurlar arzuladılar, onlara Vətənə layiqli vətəndaş olmağı tövsiyə etdilər.
Son zəngin sədaları məktəb illərinin ən gözəl xatirələrini bir daha canlandırdı. Bu əlamətdar gün məzunlarımız üçün yeni həyata atılan ilk addım, 1-ci və 4-cü sinif şagirdləri üçün isə təhsil yolunda yeni mərhələlərin başlanğıcı kimi yadda qaldı. Müəllimlər və valideynlər üçün isə bu gün qürur, sevinc və kövrək duyğularla müşayiət olundu.
Bütün məzunlarımızı, birincilərimizi və ibtidai təhsili başa vuran dördüncülərimizi ürəkdən təbrik edir, onlara təhsil həyatlarında, gələcək fəaliyyətlərində və bütün həyat yollarında uğurlar arzulayırıq.
