Lənkəran Şəhər İcra Hakimiyyətində silsilə tədbirlər davam edir
Taleh Qaraşov Aşura günü şəhidlərimizin məzarlarını ziyarət edib
Lənkəran Şəhər İcra Hakimiyyətinin (ŞİH) başçısı Taleh Qaraşov Aşura günündə icra aparatının məsul şəxsləri, rayonun hüquq mühafizə orqanlarının rəhbərləri və şəhid ailələrinin üzvləri ilə birgə müstəqilliyimizin qorunması, torpaqlarımızın azadlığı, sərhədlərimizin müdafiəsi və ərazi bütövlüyümüzün bərpası uğrunda canını fəda edən Lənkərandan olan milli qəhrəmanların abidəsini və şəhidlərin şəhərin Şəhidlər Xiyabanı, Kiçik Bazar və Şilavar qəbiristanlığındakı məzarlarını ziyarət edib.
Milli qəhrəmanların abidəsi və şəhid məzarları önünə tər çiçəklər düzülüb, ruhlarına dualar oxunub. Taleh Qaraşov Milli Qəhrəman və şəhid ailələri ilə söhbət edib, onların qayğı və istəkləri ilə maraqlanıb.
Rayonun bütün inzibati ərazi dairələrindəki şəhidlərin məzarları da Lənkəran ŞİH aparatının məsul şəxslərinin iştirakı ilə ziyarət olunub, şəhidlərimizə olan hörmət və ehtiram, onların ailə üzvlərinə qarşı diqqət və qayğı göstərilib.
Qeyd edək ki, Aşura günü ilə bağlı iyulun 15-16-da Mərkəzi Qan Bankının Lənkəran bölməsində qanvermə aksiyası təşkil olunub, donorlardan götürülən qanlar yoxlanıldıqdan sonra talassemiya, hemofiliya və digər qan xəstəliklərindən əziyyət çəkənlərin müalicəsində istifadə olunacaq.
Kosalar və Bala Şürük kəndlərinin sakinləri Taleh Qaraşovun səyyar görüş-qəbulundan razı qalıblar
İyulun 10-da təqvim planına uyğun olaraq Lənkəran Şəhər İcra Hakimiyyətinin (ŞİH) başçısı Taleh Qaraşov Kosalar kənd inzibati ərazi dairəsinin sakinləri ilə səyyar görüş-qəbul keçirib. Səyyar qəbulda icra hakimiyyəti aparatının məsul şəxsləri, hüquq mühafizə orqanlarının rəhbərləri, yerli idarə və müəssisələrin nümayəndələri də iştirak ediblər.
Taleh Qaraşov ötən səyyar görüşdə qaldırılan məsələlərin icra vəziyyəti barədə yerli sakinləri məlumatlandırıb. Onun sözlərinə görə, cənab Prezident İlham Əliyevin və Birinci vitse-prezident Mehriban xanım Əliyevanın xüsusi tapşırığına uyğun olaraq vətəndaşların bütün müraciətlərinə həssas yanaşılır, dərindən təhlil edilir, qaldırılan məsələlər ümumiləşdirilir, həlli üçün uyğun mexanizmlər və təkliflər irəli sürülür.
Taleh Qaraşov səyyar qəbulda qaldırılan yerli icra hakimiyyətinin səlahiyyətlərinə aid olan məsələlərin yerindəcə həlli istiqamətində göstərişlərini verib, icra hakimiyyətinin səlahiyyətlərinə aid olmayan məsələlərin həlli üçün aidiyyəti qurumlara rəsmi müraciətlərin edilməsi və nəticəsi barədə vətəndaşlara məlumat verilməsini səlahiyyətli şəxslərə tapşırıb.
Kosalar kənd inzibati ərazi dairəsinin sakinləri fikir və istəklərini sərbəst şəkildə icra başçısına söyləyiblər, qaldırdıqları məsələlərin həllindən ötrü səmimi yanaşmaya görə rayon rəhbərinə təşəkkür ediblər. Yerli sakinlər cənab Prezident İlham Əliyevə və Birinci vitse-prezident Mehriban xanım Əliyevaya ölkədə sosial istiqamətdə mühüm nailiyyətlərin əldə olunmasına və bütün bunları gündəlik həyatlarında hiss etdiklərinə görə minnətdarlıqlarını ifadə ediblər.
