Son günlər bəzi saytların Mil-Qarabağ və Aşağı Şirvan Kollektorunun İstismarı İdarəsinin fəaliyyəti və idarənin rəisi Valeh Qaraşov haqqında tirajladığı məlumatlar, təəssüf ki, peşəkar jurnalistika ilə heç bir əlaqəsi olmayan, faktlardan uzaq, sifarişli və qərəzli yazıların davamıdır. Mövcud yazılarda məqsəd İdarənin həyata keçirdiyi mühüm layihələrə, xüsusilə də 173 min hektardan çox ərazinin su təminatını əhatə edən böyük sistemin işinə kölgə salmaq, ictimaiyyətdə yanlış rəy formalaşdırmaq, şəxsi ambisiyaları dövlət qurumlarının üzərinə yönəltməkdir.

pressmedia.info olaraq bildiririk ki, yayılan iddialar tamamilə əsassızdır, təhrif edilmiş məlumatlara əsaslanır və ictimaiyyəti çaşdırmaq məqsədi daşıyır.

Satınalma prosesinə dair qaldırılan iddialar gerçəkliyi əks etdirmir

Bəzi saytlar tərəfindən iddia olunur ki, idarə kotirovka sorğusu nəticəsində yeni qeydiyyata alınmış “ENERVIA” MMC-ni qalib elan etməklə guya qanunvericiliyi pozub. Halbuki, ölkənin satınalma mexanizmi şəffaf elektron sistem üzərində qurulub və bütün proseslər yalnız rəqabət, uyğunluq və qiymət üstünlüyü əsasında müəyyən edilir.

Satınalma komissiyası hər bir təchizatçının sənədlərini qanunun tələblərinə uyğun olaraq araşdırır və yalnız normativ tələbləri ödəyən şirkətlər müqavilə imzalamaq hüququ qazanır.

“ENERVIA” MMC-nin təcrübəsi, təqdim etdiyi texniki təklif, qiymət üstünlüyü və müqaviləni vaxtında icra edə biləcəyi barədə öz öhdəlikləri araşdırılmış, bu meyarlar üzrə seçim edilmişdir. Şirkətin yeni qeydiyyatdan keçməsi isə qanunvericilik baxımından heç bir məhdudiyyət yaratmır – əksinə, dövlət satınalmalarına yeni şirkətlərin cəlb olunması **rəqabətin artırılması mexanizminin ayrılmaz hissəsidir.**

İddia olunduğu kimi qanun pozuntusu yoxdur

“Dövlət Satınalmaları haqqında” Qanunun tələbləri açıq şəkildə göstərir ki, təchizatçı əsas meyarlara cavab verdiyi halda, onun fəaliyyət müddəti məhdudlaşdırıcı faktor deyil.

Konkret təcrübə, təqdim edilən texniki imkanlar, maliyyə öhdəliklərini yerinə yetirmə qabiliyyəti və təqdim olunan sənədlər qiymətləndirmədə əsas rol oynayır.

Bu səbəbdən, “ENERVIA” MMC-nin seçilməsi heç bir qanun pozuntusu deyil, sadəcə ən sərfəli təklifin seçilməsi mexanizmidir.

Digər iddialar da təhrif və manipulyasiyadır

Müxtəlif anonim mənbələrə istinadən yazılanlar arasında başqa bir iddia da səsləndirilir ki, guya şirkət idarə ilə əvvəl işləmiş şəxslərə bağlıdır. Lakin bu barədə heç bir hüquqi sənəd, rəsmi fakt, təsdiqlənmiş məlumat yoxdur. Bu isə göstərir ki, yayılan xəbərlər subyektiv, yoxlanılmamış və qərəzlidir.

Valeh Qaraşovun fəaliyyəti uzun illərin təcrübəsinə, peşəkarlığa və şəffaf idarəçiliyə dayanır

Valeh Qaraşov 2017-ci ildən bu günə qədər Mil-Qarabağ və Aşağı Şirvan Kollektorunun İstismarı İdarəsinə rəhbərlik edir. Ondan əvvəl Kürdəmir Suvarma Sistemləri İdarəsində, daha sonra Mollakənd Mexaniki Suvarma İdarəsində çalışması ona geniş təcrübə qazandırmışdır.

Onun idarə etdiyi qurum Yevlax, Bərdə, Ağcabədi, Kürdəmir, Zərdab və Ağsu rayonlarını əhatə edən son dərəcə geniş suvarma infrastrukturuna cavabdehdir. Bu sistem ölkənin kənd təsərrüfatının mühüm hissəsini əhatə etdiyi üçün, burada aparılan hər bir iş yüksək məsuliyyət tələb edir.

Valeh Qaraşov rəhbərliyi dövründə:

* kollektorların təmizlənməsi və bərpasını sistemli şəkildə təşkil etmiş,
* kənd təsərrüfatı üçün su təminatının stabilliyini artırmış,
* nasos stansiyalarında və kanallarda innovativ yanaşmalar tətbiq etmiş,
* vətəndaş qəbulları və səyyar görüşlərlə bölgə sakinlərinin problemlərini operativ şəkildə həll etmişdir.

Bu fəaliyyətlər regionlarda minlərlə fermerin məhsul istehsalına birbaşa təsir göstərən əsas amillərdəndir.

Əsas məqsəd görülən işlərə kölgə salmaqdır

Bəzi saytlar tərəfindən aparılan qarayaxma kampaniyası, əslində, Valeh Qaraşovun uzun illər ərzində qurduğu iş sistemini nüfuzdan salmağa yönəlmiş cəhdlərdən başqa bir şey deyil. Həqiqət isə ondan ibarətdir ki, onun rəhbərliyi dövründə idarə fəaliyyətində şəffaflıq, məsuliyyət və peşəkarlıq daha da artmış, regionlara xidmət keyfiyyəti əhəmiyyətli dərəcədə yüksəlmişdir.

pressmedia.info olaraq bildiririk:

Bu kimi əsassız iddialar hüquqi qiymətini alacaq

Biz məsul jurnalistikanın prinsiplərinə sadiq qalaraq bildiririk ki, Valeh Qaraşov barəsində yayılan qərəzli yazılar ictimai rəyi çaşdırmağa, dövlət qurumlarının fəaliyyətinə ləkə vurmağa yönəlmiş addımlardır.

İdarənin fəaliyyəti dövlət tərəfindən daim nəzarətdədir və bütün proseslər qanuna uyğun şəkildə həyata keçirilir.