2025-ci il – “Konstitusiya və Suverenlik İli” [xfgiven_qirmizi] [/xfgiven_qirmizi]
2025-ci il Azərbaycanda xüsusi bir əhəmiyyət daşıyan il kimi tarixə düşüb. Bu il ölkəmizdə “Konstitusiya və Suverenlik İli” elan olunub. Bu qərar təsadüfi deyil, çünki Azərbaycanın dövlət müstəqilliyi, milli suverenliyi və Konstitusiyası bu gün xalqımızın azad, güclü və hüquqi dövlət kimi yaşamasının əsasını təşkil edir.
Azərbaycan Respublikasının Konstitusiyası – xalqımızın iradəsini, dövlətin quruluşunu, insan və vətəndaş hüquqlarını təmin edən ali qanundur. 1995-ci il noyabrın 12-də qəbul edilən bu sənəd ölkəmizin demokratik, hüquqi və dünyəvi dövlət kimi formalaşmasının hüquqi bazasını yaratdı. Bu baxımdan 2025-ci ilin “Konstitusiya və Suverenlik İli” kimi qeyd olunması həm də müstəqilliyimizin bərpasının və bu müstəqilliyin hüquqi əsaslarının 30 illik yoluna dərin bir hörmətin ifadəsidir.
Konstitusiyanın əhəmiyyəti təkcə qanunlar toplusu olmasında deyil, həm də cəmiyyətin bütün sahələrində sabitlik, ədalət və bərabərlik prinsiplərinin təmin edilməsindədir. Bu sənəd hər bir Azərbaycan vətəndaşının hüquqlarını qoruyur, dövlətin və cəmiyyətin qarşılıqlı münasibətlərini tənzimləyir. Konstitusiyanın ədalətli şəkildə tətbiqi ölkəmizin hər bir sahədə inkişafına – iqtisadi, siyasi, sosial və mədəni həyatına böyük töhfə verir.Suverenlik isə Azərbaycan xalqının öz taleyini müstəqil şəkildə müəyyən etməsi deməkdir. 1991-ci ildə bərpa olunmuş müstəqilliyimiz sonrakı illərdə qorunub möhkəmləndirildi, dövlətçiliyimiz sarsılmaz təməllər üzərində inkişaf etdi. Xüsusilə də 2020-ci il Vətən müharibəsində qazanılan tarixi Qələbə xalqımızın suverenliyinin bərpasının ən ali ifadəsi oldu. Bu qələbə sayəsində Azərbaycan ərazi bütövlüyünü təmin etdi, tarixi ədaləti bərpa etdi və öz suveren hüquqlarını tam şəkildə həyata keçirdi.2025-ci ilin “Konstitusiya və Suverenlik İli” elan olunması həm də gənc nəsildə vətənpərvərlik duyğularının, dövlətçilik ənənələrinin və hüquqi düşüncənin daha da gücləndirilməsi məqsədi daşıyır. Bu il ərzində məktəblərdə, universitetlərdə, dövlət qurumlarında və ictimai təşkilatlarda Konstitusiyanın mahiyyətini, suverenliyin dəyərini anlatmaq üçün müxtəlif tədbirlər keçiriləcək.Bu il bizi bir daha düşündürür ki, dövlətin gücü yalnız iqtisadi və hərbi sahədə deyil, həm də hüquqa, ədalətə və milli birliyə söykənir. Hər bir Azərbaycan vətəndaşı Konstitusiyanın ona verdiyi hüquq və azadlıqlardan istifadə etməklə yanaşı, dövlət qarşısında olan borcunu da dərk etməlidir.Nəticə etibarilə qeyd etmək olar ki ,“Konstitusiya və Suverenlik İli” – bu, sadəcə bir şüar deyil, Azərbaycanın dövlətçilik fəlsəfəsini, milli kimliyini və hüquqi düşüncəsini birləşdirən mənəvi çağırışdır. Bu il bizə bir daha xatırladır ki, suverenliyin qorunması, Konstitusiyanın aliliyi və xalqın birliyi – müstəqil Azərbaycanın gələcəyinin əsas təminatıdır.
Bakı Qızlar Universiteti tələbəsi Xudaşlı Ləman
Nəsimi rayon gənci
