Ermənistan və Türkiyə qarşılıqlı ticarətin birbaşa gömrük rəsmiləşdirilməsinə rəsmən start verib.

Musavat.com xəbər verir ki, bu barədə Ermənistanın xarici işlər naziri Ararat Mirzoyan parlamentdəki çıxışı zamanı bildirib.

Nazirin sözlərinə görə, bura qədər iki ölkə arasında ticarət əməliyyatları texniki olaraq üçüncü dövlətlər üzərindən rəsmiləşdirilirdi.

Lakin malların fiziki daşınması hələ də əsasən Gürcüstan marşrutu ilə həyata keçirilir.

İrəvan və Ankara arasındakı təmasları "aktiv və məhsuldar" adlandıran Mirzoyan tərəflərin təhsil, tarixi abidələrin bərpası və biznes sahələrində əməkdaşlığı genişləndirdiyini diqqətə çatdırıb.

O, növbəti Ermənistan-Türkiyə biznes forumunun 2027-ci ilin əvvəlində Ermənistanda təşkil oluna biləcəyini qeyd edib.

Sərhədlərin açılması və diplomatik əlaqələrin bərpası məsələsinə də toxunan Ermənistan XİN rəhbəri prosesin artıq icra mərhələsinə çatdığını vurğulayıb:

"İstənilən an sərhədin açılması və diplomatik əlaqələrin qurulması istiqamətində addım ata bilərik".