Babək Qasımov: Qurban bayramı – mərhəmətin, vəhdətin və milli həmrəyliyin bayramıdır [xfgiven_qirmizi] [/xfgiven_qirmizi]
Qurban bayramı min illərdir ki, insanlara mərhəmət, paylaşma, həmrəylik və Allaha bağlılıq duyğularını yaşadan ən müqəddəs bayramlardan biridir. Bu bayram, təkcə dini yox, eyni zamanda milli-mənəvi dəyərlərimizin bir güzgüsüdür. Azərbaycan xalqı hər zaman bu bayramı yüksək ehtiramla qeyd edib, onun mənəvi mahiyyətini qoruyub yaşadıb. Xüsusilə də bölgələrimizdə, kəndlərimizdə Qurban bayramının yaratdığı birlik ruhu və insani dəyərlər daha da güclü hiss olunur.
Daşkəsən rayonunun Zağalı kəndində bu dəyərlərin yaşadılmasına, bayramın ruhuna uyğun şəkildə keçirilməsinə rəhbərlik edən şəxslərdən biri də kənd bələdiyyəsinin sədri Babək Qasımovdur. Onun fəaliyyəti təkcə inzibati idarəçiliklə məhdudlaşmır – Babək müəllim eyni zamanda kənd camaatının hər bir problemi ilə maraqlanan, sevincində iştirak edən, kədərində dayaq duran, xalqla birgə nəfəs alan bir rəhbərdir.
Qurban bayramı münasibətilə hər il olduğu kimi bu il də Babək Qasımov və bələdiyyə heyəti tərəfindən kənddəki şəhid ailələri, qazilər və aztəminatlı ailələr xüsusi diqqət mərkəzində saxlanılıb. Bayram ərəfəsində kənddə bir neçə şəhid ailəsinə baş çəkilərək onların qayğıları ilə maraqlanılıb, bayram sovqatları və mənəvi dəstək göstərilib. Qurbanlıq heyvanlar kəsilərək ehtiyacı olan ailələrə paylanılıb, kənd sakinləri arasında paylaşma və birliyə çağırış mesajları verilib.
Babək Qasımov hesab edir ki, Qurban bayramının ruhuna uyğun olan əsas amal – bir-birinə dayaq olmaq, ehtiyacı olanlara əl tutmaqdır. O bildirir:
“Qurban bayramı bizim üçün sadəcə dini ritualların icrası deyil, bu bayramda insanlıq, mərhəmət, həmrəylik və vətəndaşlıq borcumuz daha qabarıq şəkildə ortaya çıxır. Biz də Zağalı kəndində bu ruhu yaşatmağı özümüzə borc bilirik. Şəhidlərimizin ruhuna ehtiramımız sonsuzdur, qazilərimizin qarşısında borcluyuq və onların həyat şəraitinin yaxşılaşdırılması hər zaman diqqətimizdədir.”
Babək Qasımovun rəhbərliyi ilə kəndin inkişafı istiqamətində bir sıra mühüm addımlar atılıb. Yol infrastrukturu yenilənib, kənd ərazisində abadlıq və təmizlik işləri aparılıb, su-kanalizasiya sistemlərinin təmiri üzrə təşəbbüslər göstərilib. Gənclər üçün idman meydançasının təşkili, uşaqlar üçün oyun sahələrinin yaradılması da onun gələcəyə hesablanmış sosial layihələrindəndir.
O, kənd məktəbi ilə sıx əməkdaşlıq quraraq təhsil alan şagirdlərin sosial rifahının yaxşılaşdırılmasına, məktəbin maddi-texniki bazasının gücləndirilməsinə dəstək göstərib. Eyni zamanda kənddə əhalinin məşğulluğunun artırılması üçün sahibkarlıq təşəbbüslərinə də hər zaman açıq olub, bir neçə ailənin öz kiçik təsərrüfatlarını qurmasına yardım edib.
Babək Qasımov bayram münasibətilə bütün Azərbaycan xalqını səmimi qəlbdən təbrik edir və bildirir:
“Qoy bu bayram hər bir evə ruzi, bol bərəkət və sevinc gətirsin. Şəhidlərimizin ruhu daim əziz tutulacaq, qazilərimiz xalqın fəxri olaraq diqqət və qayğı ilə əhatə olunacaq. Qurban bayramı bizi birləşdirən mənəvi körpüdür. Bu körpünü birlikdə qoruyub, gələcək nəsillərə ötürəcəyik.”
Məhz belə rəhbərlərin fəaliyyəti sayəsində kənd yerlərində milli birliyin, insanlıq dəyərlərinin və dövlətə sədaqətin dərin kökləri qorunur və möhkəmlənir. Babək Qasımov kimi ictimaiyyətə bağlı, xalqa xidmət etməyi borc bilən insanlar bu müqəddəs bayramın ruhunu yaşayaraq cəmiyyətə örnək olurlar.
