Erməni ekspertlər Aİ-nin yarımhərbi missiyasını Azərbaycana casusluqda ittiham edərək, göndərilməsini məqbul hesab edirlər. Aİ-nin Ermənistandakı nümayəndəliyinin rəhbəri, səfir Andrea Viktorin son mətbuat konfransında bildirib ki, Avropa İttifaqı müşahidəçiləri hesabatları nə Ermənistana, nə də Azərbaycana təqdim edirlər. Onlar hesabatlarını Brüsselə göndərirlər. Səfir həmçinin qeyd edib ki, müşahidəçilər sərhədi izləyir və gördüklərini qeyd edirlər.
“Ermənistan Avropa İttifaqının yarım hərbi-mülki müşahidə missiyasını Azərbaycana qarşı istifadə edəcəyini düşünürdü. Onlar hesab edirdi ki, Avropa İttifaqının müşahidə missiyası Azərbaycan əleyhinə raportlar yazacaq və Ermənistanın siyasi alətinə çevriləcək. Göründüyü kimi Avropa İttifaqı bu addımı atmadı. Çünki Avropa ittifaqı vasitəçilik missiyasını həyata keçirir. Avropa ittifaqının prezidenti Şarl Mişel praqmatik bir mövqe ortaya qoyur. Və Ermənistan tərəfi artıq Avropa İttifaqının bu siyasətindən narazıdır”.

Bu barədə Bizimyol.info xəbər portalına politoloq Məhəmməd Əsədullzadə danışıb. Politoloqun fikirncə, bu narazılığın əsas səbəbi Ermənistanın Azərbaycana qarşı qeyri-konstruktiv və hələ də işğal siyasətinə malik olmasından irəli gəlir.

Məhəmməd Əsədullazadə bildirib ki, Azərbaycan tərəfi ilk gündən buna etiraz edib.

“Bundan sonra Avropa İttifaqı da öz siyasətinə diqqət etməyə başladı. Gördü ki, burada birtərəfli rol ala bilməz və konkret olaraq obyektiv mövqe ortaya qoymalıdır. Mülk müşahidə missiyası şərti sərhədə yaxınlaşa bilmir. Çünki Ermənistan tərəfi təxribatlara əl atır və situasiya çox gərgindir”-deyə politoloq izah edib. O, qeyd edib ki, indi Ermənistan Avropa İttifaqının missiyasından üz döndərib, Kollektiv Təhlükəsizlik Müqaviləsi Təşkilatına üz tutub. Hərçənd ki, Rusiya da buna narazıdır.

“Ermənistan tərəfi yenə də bulanıq suda balıq tutmağa çalışır. Amma proseslər onun əleyhinə işləyir və işləyəcək də. Avropa İttifaqının da bundan sonra Azərbaycan əleyhinə hər hansı bir siyasətə imza atacağını düşünmürəm. Və Ermənistanın Avropa İttifaqı ilə əlaqələri göründüyü kimi artıq suallar doğurur”-deyən politoloqun fikrincə, Avropa İttifaqı da yaxşı bilir ki, Ermənistan tərəfinin mövqeyi qeyri-konstruktivdir.