Azərbaycan və Özbəkistan münasibətləri son illərdə yalnız diplomatik çərçivədə qalan əlaqələr deyil, əksinə siyasi, iqtisadi, humanitar, müdafiə və mədəni əməkdaşlığın ən parlaq nümunəsi kimi inkişaf edir. Prezident İlham Əliyevin UzA-ya verdiyi müsahibə isə bu əlaqələrin real mahiyyətini, tərəflərin məqsədlərini və gələcək hədəflərini daha aydın şəkildə ortaya qoydu. Müsahibədə qardaşlıq, etimad, həmrəyli) və strateji tərəfdaşlıq xətti açıq şəkildə göstərilir.
Azərbaycan Prezidenti cənab İlham Əliyev vurğulayıb ki, “Qardaşlıq sözlə deyil, əməllə ölçülür”.
Azərbaycan və Özbəkistan arasındakı bağlar yalnız müasir diplomatiyanın nəticəsi deyil; ortaq tarix, etnik yaxınlıq, dil, mədəniyyət və adət-ənənələr bu münasibətlərin təməlidir.
Sovet dövründə əlaqələr daha çox iqtisadi əməkdaşlıqla məhdudlaşırdı. Lakin müstəqillikdən sonra bu münasibətlər keyfiyyətcə yeni mərhələyə qədəm qoydu. Hər iki ölkənin liderlərinin iradəsi – Heydər Əliyev və İslam Kərimovun siyasi uzaqgörənliyi iki dövlət arasında qarşılıqlı hörmət prinsiplərini formalaşdırdı.
Prezident İlham Əliyev müsahibəsində xüsusi vurğulayır ki, Özbəkistan ilə münasibətlər sadəcə tərəfdaşlıq deyil, “qardaşlıq və etimad” üzərində qurulub. Bu siyasətin müsbət nəticələri artıq bütün sahələrdə görünməkdədir:
Siyasi əməkdaşlıq çərçivəsində, dövlət başçılarının mütəmadi səfərləri münasibətlərin yüksək səviyyədə olduğunu təsdiq edir. Türk Dövlətləri Təşkilatı daxil olmaqla, beynəlxalq təşkilatlar çərçivəsində iki ölkə daim bir-birini dəstəkləyir.
İqtisadi əlaqələrə gəldikdə isə, qarşılıqlı ticarət dövriyyəsi stabil şəkildə artır. Özbəkistanın Qarabağda, Ağdamda inşa etdiyi “Azərbaycan–Özbəkistan Dostluq Məktəbi” qardaşlığın simvoludur. Azərbaycan və Özbəkistan enerji, nəqliyyat, logistika, maşınqayırma, kənd təsərrüfatı sahələrində birgə layihələr həyata keçirməyi planlaşdırırlar.
Nəqliyyat və tranzit əməkdaşlığı da münasibətlərin əsas sütunlarından biridir. Azərbaycan regionun əsas nəqliyyat mərkəzi kimi Özbəkistan üçün Avropaya açılan ən qısa və təhlükəsiz körpüdür. Bu, gələcək iqtisadi əməkdaşlığın əsas sütunlarından biridir.
Prezident İlham Əliyevin müsahibəsi göstərdi ki, iki ölkə təkcə bu günü deyil, uzunmüddətli inkişafı da birlikdə planlayır. Bu planlar çərçivəsində Türk dünyasının inteqrasiyası prioritetdir. Azərbaycan və Özbəkistan Türk Dövlətləri Təşkilatının ən fəal üzvlərindəndəndir. Gələcəkdə vahid iqtisadi məkan, vahid nəqliyyat siyasəti və birgə istehsal layihələri gündəmdədir.
Qlobal təhlükələrin artdığı bir dövrdə iki qardaş ölkə ortaq müdafiə və təhlükəsizlik siyasəti çərçivəsində qarşılıqlı dəstəyi prioritet sayır. Eyni zamanda, mədəni əlaqələrin gücləndirilməsi də vacib hədəflərdəndir. Tələbə mübadiləsi, birgə filmlər, festivallar, ədəbiyyat layihələri xalqların yaxınlaşmasını daha da artıracaq.
Prezident İlham Əliyevin UzA-ya müsahibəsi bir daha sübut etdi ki, Azərbaycan–Özbəkistan münasibətləri sadəcə diplomatik əməkdaşlıq deyil, tarixi köklərdən bəslənən, güclü siyasi iradə ilə möhkəmlənən və gələcəyə yönəlmiş strateji qardaşlıqdır. Bu münasibətlər həm regionumuzun sabitliyinə, həm də Türk dünyasının inteqrasiyasına ciddi töhfə verir.
Cənab Prezident İlham Əliyevin dediyi kimi: “Bizim birlik və qardaşlığımız həm xalqlarımız, həm də gələcək nəsillər üçün ən böyük sərvətdir.”

Bakı Qızlar Universiteti tələbəsi Sevinc Hüseynova
Nəsimi rayon gənci