Bloomberg agentliyinin 11 yanvar tarixli yazısına görə, Ağ Ev rəsmisi ABŞ prezidenti Donald Trump-ın İrana qarşı hərbi hücumun sanksiyalaşdırılması variantını “ciddi şəkildə” nəzərdən keçirdiyini bildirib.

Məqalədə qeyd olunur ki, bu məsələ İran daxilində genişlənən etirazlar, təhlükəsizlik qüvvələrinin sərt müdaxiləsi və regionda mümkün eskalasiya fonunda gündəmə gəlib. Ağ Evdə aparılan müzakirələr zamanı bir neçə ssenari — birbaşa hərbi zərbələr, kiberəməliyyatlar, sanksiyaların genişləndirilməsi və informasiya müharibəsi variantları dəyərləndirilib.

Bloomberg yazır ki, hazırda yekun qərar verilməyib, lakin ABŞ administrasiyası Tehranın etirazlara qarşı davranışını diqqətlə izləyir. Rəsmi mənbələr bildirir ki, Tramp son günlərdə İran rəhbərliyinə qarşı ritorikasını sərtləşdirib və etirazçıların zorakılıqla susdurulmasının “ciddi nəticələr doğura biləcəyi” barədə açıq xəbərdarlıq edib.

Məqalədə həmçinin vurğulanır ki, Vaşinqton regiondakı müttəfiqləri, xüsusilə İsraillə məsləhətləşmələri intensivləşdirib və ABŞ ordusunun Yaxın Şərqdəki mövqeləri yüksək hazırlıq vəziyyətində saxlanılır. İran tərəfi isə mümkün hücumun cavabsız qalmayacağını bəyan edib.

Bloomberg-in təhlilinə görə, Tramp administrasiyası hazırda təzyiqi maksimum həddə çatdırmaq, lakin birbaşa müharibəyə girmədən Tehran üzərində siyasi və psixoloji təsiri artırmaq strategiyasını davam etdirir.