Hazırda əmlak bazarında alıcılara fərqli qiymətlərə mənzillər və fərdi yaşayış evləri təqdim edilir. Ərazidən asılı olaraq bu mülklərin dəyəri də müxtəlifdir. Lakin bazara ümumi nəzər salsaq mənzillərin qiymətinin nə azaldığını, nə də artdığını müşahidə etmiş olarıq. Bəs görəsən hazırda paytaxtın mərkəzi və ətraf yerlərində evlərin qiymətləri neçədir? Ucuz bina və həyət evlərini hansı ünvanda tapmaq olar?

Əmlak eksperti Ramil Qasımzadə mövzu ilə bağlı BAKU.WS-ə açıqlamasında bildirib ki, Bakının Səbail, Nəsimi, Yasamal, Nərimanov kimi rayonlarında təmirsiz evlərin kvadratmetri ən azı 1800 AZN-dən başlayır.

"Nəsimi, Səbail, Nərimanov daha bahalı rayonlardır. Burada elit layihəli binalar da var, orada bir kvadratmetr 8000 AZN-dən başlayır. Bura "Port Baku", "Şəhər bağları" kimi layihələr daxildir. Nərimanovda təmirsiz binada mənzilin bir kvadratmetri 2400-dən AZN, Yasamalda 1800 AZN-dən, Nəsimi rayonunda 2600 AZN-dən başlayır. Təmirlilər də isə bu qiymətlərə 400-500 AZN əlavə olunur".

Ekspert onu da bildirib ki, bəzən bina evlərin sahəsinin böyük olması onların hər kvadratmetrində endirimə səbəb olur;

"Yeni tikililərdə təmirsiz evlərin bir kavdaratmetri 2400 AZN-dən başlayır, sahəsi 200 kvadratmetrdən çox olan mənzillərdə isə qiymət 1900 AZN-ə qədər endirilə bilər. Lakin 100 kvadratmetrə qədər olan mənzillərin bir kvadratmetri 2400-2800 AZN-ə təklif edilir. Təmirli evlərdə isə bu qiymət daha yuxarı olur. Onların kvadratmetri 2800 AZN-dən başlayaraq təklif edilir. Böyük kvadratlı mənzillərdə isə bu qiymət 2300 AZN təşkil edir".

Ramil Qasımzadə vurğulayıb ki, "Xruşşovka" və "Leninqrad" tipli layihələrdə isə evlər 110-170 000 AZN aralığında dəyişir:

"Köhnə tikililərdə isə otaq sayına və layihəyə əsasən fərqlidir. Nərimanov rayonunda "Xruşşovka" tipli layihədə bir otaqlı təxminən 110 000 AZN, iki otaqlı 130 000 AZN-dən, üç otaqlılar isə 180 000 AZN-dən başlayır. "Leninqrad" layihəli binalarda isə bu qiymətlər daha yuxarıdır, bir otaqlı 130 000 AZN-dən, iki otaqlı 170 000 AZN-dən, üç otaqlı isə 200 000 AZN və daha yuxarı qiymətlərə ola bilir. Metrolara yaxın binalarda evlər digərlərinə nisbətən 15 faiz daha baha olur".

Ekspert Bakının mərkəzi və ətraf ərazilərdə olan fərdi yaşayış evlərindən də danışıb. O qeyd edib ki, bu evlərin qiyməti torpaq sahələrinin qiymətindən asılı olaraq dəyişir.

"Məsələn mərkəzdə yerləşən fərdi yaşayış evinin qiyməti bəzən milyonlarla ölçülür. Nərimanov rayonunun Həsən Əliyev küçəsində 1 sot torpağın qiyməti təxminən 350 000 AZN-dən başlayır. Ətraf ərazilərdə isə elə rayonlar var ki 1 sot orada 5000 AZN-dir. Buna şəhərdənkənar bağ evləri və başqaları buna aiddir. Bunlar əsasən Sabunçu, Suraxanı rayonlarında fərdi evlər yerləşmə yerindən asılı olaraq dəyişir. Fərdi yaşayış evləri 50 000 AZN-dən başlayaraq 40 milyon AZN-ə qədər fərdi yaşayış evləri mövcuddur" - deyə, Ramil Qasımzadə bildirib.

Ekspert qeyd edib ki, Bakı ətrafında yeni tikililərdə ucuz evlər daha çox Lökbatan, Sahil kimi qəsəbələr, Xəzər, Pirallahı kimi rayonlardadır:

"Bu ərazilərdə yeni tikililərdə təmirsiz evlərin kvadratmetri təxminən 1400 AZN-dən, təmirli evlərin kvadratmetri isə təxminən 1600-1700 AZN-dən başlayır. Xətai və Nizami rayonlarının mənzil qiymətləri isə orta seqmentə daxildir. Burada da 2000-2400 AZN aralığında qiymətlər dəyişir".

Ramil Qasımzadə onu da bildirib ki, Abşeron rayonu Masazır qəsəbəsində evlərin bir kvadratmetri 1300 AZN-dən başlayır. Ekspert Masazırda sotu 20 000 AZN olan torpaq sahəsi də olduğunu vurğulayıb:

"Qobu qəsəbəsində torpağın 1 sotu 2000 AZN-dir. Xırdalanda torpağın sotu isə 7000-8000 AZN aralığındadır. Masazırda isə elə yer var ki, orada torpağın sotu 5000 AZN və 20 000 AZN-dir. Məsələn: Əliağa Vahid küçəsində 1 sot torpaq 20 000 AZN təşkil edir".