Elvin Paşayev: Xalq növbəti dəfə İlham Əliyevlə davam əzmini və istəyini nümayiş etdirdi [xfgiven_qirmizi] [/xfgiven_qirmizi]
Göygöl Rayon İcra Hakimiyyətinin başçısı Elvin Paşayev - Azərbaycan xalqı yeni tarixi mərhələyə qədəm qoydu. 7 fevral növbədənkənar prezident seçkilərində cənab İlham Əliyevi dəstəkləyən xalqımız bütövləşmiş Azərbaycanın sonrakı inkişafında yeni səhifə açdı. Qədirbilən xalqımız ümummilli dərdimiz olan Qarabağ problemini həll edən, erməni separatizminə son qoyan Müzəffər Ali Baş Komandanını mütləq səs çoxluğu ilə qalib etməklə milli həmrəyliyə sədaqətini və Prezidentinə sonsuz etimadını bütün dünyaya növbəti dəfə nümayiş etdirdi. Səsvermədə qazanılan qələbə Xalq-Lider birliyinin Azərbaycanı bundan sonra da yeni nailiyyətlərə və uğurlara doğru aparacağını təsdiqlədi. Tarixin bütün dövrlərində hər bir liderin müqəddəs vəzifəsi öz xalqını və ölkəsini layiqincə təmsil etmək, onun mənafeyini qorumaq, təhlükəsizliyini təmin etmək, mümkün təhlükələrdən xilas etməkdən ibarət olub. Bu xoşbəxtlik hər bir liderə qismət olmur və liderin yanlış qərarları ilə çarəsiz və səfalət içində çabalayan ölkələr və xalqlar görmüşük. Təəssüflər olsun ki, belə nümunələr bugünümüzdə də mövcuddur. Amma xalqın içindən çıxan elə həqiqi liderlər də görmüşük ki, fəaliyyəti ilə millətinin sevimlisinə, fenomeninə çevrilib. Bir əsr bundan öncə dünya ilə savaşaraq xalqı üçün cümhuriyyət miras qoyub gedən Atatürk kimi… Azərbaycanı, onun müstəqilliyini qoruyaraq ölkəmizin düşmənlərinə yerini göstərərək Qurtuluş salnaməsi yazan Ümummilli Lider Heydər Əliyev kimi... Və 200 illik tariximizi şərəfləndirərək Azərbaycanı bütövləşdirərək xalqına Zəfər yaşadan Prezident İlham Əliyev kimi! Prezident seçildiyi gündən siyasi kursunun mərkəzində insan amilinin dayandığını bildirən, vətəndaşların hüquq və mənafelərinin dövlətin ali dəyəri elan edən cənab İlham Əliyev bütün fəaliyyəti dövründə vədinə sadiq qalmaqla cəmiyyətin mütləq əksəriyyətinin rəğbətini və etimadını qazana bildi. Ötən illərin reallıqları sübut etdi ki, Ümummilli Lider Heydər Əliyevin siyasi kursunun müəyyən etdiyi sülh, sabitlik və tərəqqi yoluna sadiqlik cənab Əliyevə sevgi gətirdi. Beynəlxalq müstəvidə münasibətlərin yüksək səviyyədə qurulması, qüdrətli iqtisadiyyat və yeni çağırışlar üzərində güclü ordunun yaradılması uğura gedən yolun başlanğıcı oldu.
7 fevral seçkilərində seçicilərin mütləq əksəriyyətinin məhz cənab İlham Əliyevi dəstəkləməsi ötən illərin uğurları və mükəmməl nəticələrin göstəriciləri oldu. Prezident İlham Əliyevin birbaşa rəhbərliyi ilə ötən illərdə dövlət sosial proqramlarının səmərəli icrası nəticəsində hər bir azərbaycanlının yüksək həyat səviyyəsi, sosial təminatı üçün əlverişli şərait yaradıldı. Xalqın ümidlərini, yüksək etimadını doğruldan Prezident İlham Əliyev ölkənin inkişafının bütün sahələrində, o cümlədən iqtisadi, siyasi, sosial və mədəni sahələrdə başladığı genişmiqyaslı dəyişiklikləri həyata keçirdi. Məhz Prezidentin fəaliyyəti nəticəsində müasir Azərbaycan dünyada inkişaf etmiş iqtisadiyyatı, sağlam siyasi, o cümlədən sosial və biznes mühiti ilə tanınan dövlət kimi ən etibarlı tərəfdaşa çevrildi. Məhz bu siyasətin davamı kimi bu gün Azərbaycan dünyada layiqli olduğu yerdədir, beynəlxalq siyasətin koordinasiya sistemində mühüm rol oynayır, məqsədyönlü islahatlar siyasəti aparır, dünyada enerji resurslarının etibarlı təchizatçısı, qarantı kimi çıxış edir, regionda sülh və sabitlik üçün mühüm aktordur. Prezident İlham Əliyevin rəhbərliyi ilə Azərbaycanda uzunmüddətli layihələrdə iştirak edən bir sıra ölkələrin inkişafına töhfə verən nəhəng transmilli enerji və nəqliyyat layihələri həyata keçirilmişdir. Avropanın enerji təhlükəsizliyinin qarantı rolunu oynayan Cənub Qaz Dəhlizi, TANAP və TAP enerji layihələri də Azərbaycanın iqtisadi maraqlarını uzaq sahillərdə təşviq etmək məqsədi daşıyır. Azərbaycanın müttəfiqlərinin, dostlarının sayının artması məhz Prezident İlham Əliyevin həyata keçirdiyi siyasət nəticəsində mümkün oldu. Regional və qlobal təşəbbüslər Azərbaycanın dünyada imicinin möhkəmlənməsinə, eləcə də regionda əməkdaşlığın inkişafına xidmət etdi. Bu gün Avrasiyada qlobal əhəmiyyətli layihələrin mühüm iştirakçısı kimi Azərbaycan böyük diqqət və hörmətlə xarakterizə olunur. Şübhəsiz ki, bütün bunlar xalqımızın şəriksiz lideri Prezident İlham Əliyevin tarixi xidmətləridir. Bununla yanaşı Prezident İlham Əliyev xalq-lider tandeminin sarsılmazlığını dünyaya nümayiş etdirən lider kimi xalqımızın canlı əfsanəsinə çevrildi, ümumxalq sevgisi qazandı, tarix üçün tarix yazdı. Prezident İlham Əliyev bütün dünyaya nümayiş etdirdi ki, Azərbaycan xalqı qəhrəman və sülhsevər, eyni zamanda, fədakardır, öz haqqını geri qaytarmağa, tarixi ədaləti bərpa etməyə qadirdir. Tarixi ədaləti Zəfər seçkisinin alternativi olmayan xalqın namizədi bərqərar etdi və sevgi ilə qalib oldu. 7 fevralda keçirilən növbədənkənar prezident seçkilərində bütün namizədlər üçün təşviqat imkanları yaradılmışdı. Ölkə qanunvericiliyinin və beynəlxalq standartların tələblərinə tam uyğun, şəffaf şəkildə keçirilən seçkilər dünya demokratiyası üçün də nümunə oldu. Beləliklə, 7 fevral seçkiləri ilə bir daha onu göstərdi ki, xalqımız Prezident İlham Əliyevlə davam əzmini, xarakterini nümayiş etdirərək Azərbaycanın növbəti uğurlarına, xoşbəxtliyinə yeddi illik mandat verdi. Olduqca haqlı qərar, düzgün seçim idi. Zəfərin mübarək, Azərbaycan!
