İntiqam Cümşüdov haqqında yayılan iddialara aydınlıq gətirildi – Həqiqət təhrif oluna bilməz [xfgiven_qirmizi] [/xfgiven_qirmizi]
Son günlər bəzi sayt və sosial şəbəkə hesablarında Xətai Rayon Mənzil Kommunal Təsərrüfat Birliyinin rəis müavini İntiqam Cümşüdovun fəaliyyəti ilə bağlı yayılan iddialar ictimaiyyət arasında suallar yaradıb. pressmedia.info olaraq bildiririk ki, səsləndirilən məlumatların konkret sübutlara deyil, fərziyyə və şayiələrə əsaslanır və bir çox hallarda qərəzli xarakter daşıyır.
Xətai rayonunda aparılan abadlıq, məhəllədaxili yolların təmiri, yaşayış binalarının dam örtüklərinin yenilənməsi, lift təsərrüfatının bərpası və kommunal infrastrukturun yaxşılaşdırılması istiqamətində son illərdə ciddi işlər görülüb. Bu işlərin təşkilində və koordinasiyasında Mənzil Kommunal Təsərrüfat Birliyinin rolu danılmazdır. İntiqam Cümşüdov da məhz bu proseslərin icrasında iştirak edən vəzifəli şəxslərdən biridir.
Rayonda qanunsuz tikililərlə bağlı səsləndirilən iddialara gəldikdə isə qeyd olunmalıdır ki, tikintilərə nəzarət və icazə prosedurları birbaşa müvafiq dövlət qurumlarının səlahiyyətindədir. Mənzil Kommunal Təsərrüfat Birliyi isə əsasən istismar, saxlanma və kommunal xidmətlərin təşkili ilə məşğuldur. Bu baxımdan, bütün məsuliyyəti bir vəzifəli şəxsin üzərinə yönəltmək hüquqi və məntiqi baxımdan əsaslı görünmür.
Sosial mediada yayılan videogörüntülərin emosional təqdimatı cəmiyyətə birtərəfli mənzərə təqdim edir. Lakin hər hansı tikintinin qanunsuz olub-olmaması yalnız rəsmi araşdırma və sənədlər əsasında müəyyən edilə bilər. İddiaların sübut olunmadan fakt kimi təqdim edilməsi həm etik prinsiplərə, həm də jurnalistikanın peşə standartlarına ziddir.
İntiqam Cümşüdovun guya “vasitəçi” kimi çıxış etməsi və ya hansısa işbazlarla əlaqədə olması barədə deyilənlər isə konkret fakt və hüquqi sənədlərlə təsdiqlənməyib. Dövlət qurumunda çalışan hər bir şəxs kimi onun da fəaliyyəti qanunvericiliyə uyğun şəkildə qurulub və nəzarət mexanizmləri mövcuddur.
Onun adına bağlanan obyektlər və milyonluq sərvət iddiaları da bu günə qədər rəsmi təsdiqini tapmayıb. Hər hansı əmlakın kimə məxsus olması müvafiq reyestr məlumatları ilə müəyyən olunur və bu məsələlər yalnız hüquqi prosedur çərçivəsində araşdırıla bilər. Şayiə xarakterli məlumatların tirajlanması isə ictimai rəyə təsir göstərmək məqsədi daşıyır.
Qeyd edilməlidir ki, Xətai rayonu paytaxtın ən dinamik inkişaf edən ərazilərindən biridir. Yeni yaşayış kompleksləri, sosial obyektlər və infrastruktur layihələri rayonda ümumi urbanizasiya prosesinin tərkib hissəsidir. Bu inkişaf prosesini tamamilə neqativ fonda təqdim etmək obyektiv yanaşma sayıla bilməz.
İntiqam Cümşüdov uzun illərdir kommunal təsərrüfat sahəsində çalışır və bu müddətdə rayon sakinlərinin məişət şəraitinin yaxşılaşdırılması istiqamətində bir sıra layihələrdə iştirak edib. Onun fəaliyyəti nəticəsində bir çox həyətlər abadlaşdırılıb, yaşıllıq zolaqları salınıb, məhəllələrdə təmizlik və nizam-intizam gücləndirilib.
Heç bir qarayaxma kampaniyası görülən real işlərə kölgə sala bilməz. Dövlət qulluqçusunun fəaliyyəti ilə bağlı hər hansı iddia varsa, bu, hüquqi müstəvidə araşdırılmalı, nəticə isə rəsmi qaydada açıqlanmalıdır. Medianın və ictimaiyyətin əsas vəzifəsi isə emosiyalara deyil, faktlara söykənməkdir.
pressmedia.info olaraq hesab edirik ki, cəmiyyətdə sağlam informasiya mühiti formalaşdırmaq hər kəsin borcudur. Yazıda adı keçən şəxslərin və qurumların mövqeyini dərc etməyə hazırıq və məsələnin obyektiv araşdırılmasının tərəfdarıyıq. Həqiqət gec-tez üzə çıxır və qərəzli yanaşmalar heç zaman ədalətin qarşısında dayana bilmir.
