Neftçalanın inkişafına rəhbərlik edən Mirhəsən Seyidova qarşı aparılan böhtan kampaniyası nəticəsiz qalacaq [xfgiven_qirmizi] [/xfgiven_qirmizi]
Son günlər sosial şəbəkələrdə və bəzi saytlarda Neftçala Rayon İcra Hakimiyyətinin başçısı Mirhəsən Seyidov haqqında yayılan əsassız məlumatlar cəmiyyətdə çaşqınlıq yaratmaq məqsədi daşıyır. Xüsusilə də Balıq Festivalı zamanı icra başçısının geyindiyi plaşın guya “Hugo Boss Burberry” adlı brendə məxsus olması və qiymətinin 26 min manat olması barədə irəli sürülən iddialar tamamilə yalandır. Bu cür informasiyalar özünü “media orqanı” adlandıran, lakin peşə etikasından uzaq şəxslərin diqqət toplamaq üçün uydurduğu böhtanlardan başqa bir şey deyil.
Mirhəsən Seyidov məsələ ilə bağlı açıqlamasında bu iddiaların gülünc olduğunu qeyd edib: “Birincisi, ‘Hugo Boss Burberry’ adlı marka olduğunu ilk dəfə eşidirəm. İkincisi, həmin plaşı üç il əvvəl cəmi 350 manata almışam. Digər tərəfdən isə bu informasiyanı yayan şəxsləri Neftçalaya dəvət edirəm ki, gəlib burada artan iqtisadi gücü və zəhmətkeş insanlarımızın əməyini işıqlandırsınlar.” Bu açıqlama göstərir ki, icra başçısı təkcə böhtanlara cavab vermək deyil, həm də regionun inkişafını obyektiv şəkildə təqdim etmək çağırışı edir.
Neftçala son illər Mirhəsən Seyidovun rəhbərliyi ilə ciddi sosial-iqtisadi yüksəliş mərhələsinə qədəm qoyub. İnfrastrukturun yenilənməsi, yol-nəqliyyat layihələrinin genişləndirilməsi, kənd təsərrüfatında modern texnologiyaların tətbiqi, yeni sosial obyektlərin tikintisi və əhalinin rifahını artıran digər addımlar bölgədə gözlə görünən dəyişikliklər yaradıb. Xüsusilə də rayonda abadlıq, yaşıllaşdırma, içməli su, işıq-köməkçi xidmətlər sahəsində görülən işlər Neftçalanın simasını yenidən formalaşdırır.
Rayon sakinləri arasında apardığımız müşahidələr də göstərir ki, Mirhəsən Seyidov bu gün Neftçalada yüksək hörmət qazanan məmurlardan biridir. Onun mütəmadi olaraq keçirdiyi səyyar qəbullar, şəhid ailələrinə, qazilərə, aztəminatlı ailələrə göstərdiyi xüsusi diqqət və real praktiki dəstək cəmiyyətdə böyük rəğbətlə qarşılanır. İnsanları dinləyən, problemləri yerində həll edən icra başçısı modelini tətbiq edən Seyidovun fəaliyyəti bölgədə şəffaf idarəçiliyin nümunəsi kimi dəyərləndirilir.
Məhz bu nailiyyətlərin fonunda bəzi şəxslərin Mirhəsən Seyidova qarşı böhtan kampaniyası aparması təsadüfi görünmür. Əldə olunan uğurları kölgəyə salmaq, rayonun yüksəlişini ləkələmək və icra başçısının nüfuzuna xələl gətirmək istəyən çevrələr sosial şəbəkələrdə saxta gündəm yaratmağa çalışırlar. Lakin belə cəhdlərin heç bir real dayağı yoxdur və cəmiyyət tərəfindən də toy-şou səviyyəli təbliğat kimi qiymətləndirilir.
pressmedia.info olaraq bildiririk ki, jurnalistika dezinformasiya yaymaq, şəxslərə böhtan atmaq və cəmiyyətdə çaşqınlıq yaratmaq üçün bir vasitə deyil. Peşəkar media gerçəyi araşdırmalı, faktlara söykənməli və cəmiyyətin maariflənməsinə xidmət etməlidir. Təəssüf ki, bəzi saytlar reytinq və klik xətrinə yalan məlumatlar tirajlayaraq həm cəmiyyətə, həm də ümumi olaraq jurnalistika peşəsinə kölgə salırlar.
Mirhəsən Seyidovun fəaliyyəti isə həm rəqəmlərdə, həm görülən işlərdə, həm də Neftçala əhalisinin ona olan münasibətində öz aydın təsdiqini tapır. Ona atılan böhtanlar isə Neftçalanın inkişafının qarşısını almağa qadir deyil – çünki gerçək işlər, real nəticələr heç bir uydurma məlumatdan güclüdür.
İcra başçısına qarşı aparılan bu əsassız kampaniya iflasa məhkumdur. Neftçala isə inkişaf yolunda inamla irəliləməyə davam edir.
